Arnfinn Kolerud vitjar Moa bibliotek for å gi tips om korleis ein kan bli ein god nynorskaktivist, anten det er enkelt og stillferdig gjennom dikt-på-do, korrekturlesing og korrekturbrodering eller på meir utagerande og framfuse vis.
Kolerud har ein særeigen penn full av humor og underfundige vendingar. Forfattaren, som er oppvaksen i Isfjorden og bur på Måløy, har skrive ei rekkje prislønte bøker for barn, ungdom og vaksne. Dei tre siste bøkene hans er ein absurd og spinnvill framtidstrilogi om folka i Vassbygda/Vassbygdi, den siste plassen i Noreg som enno ikkje har gitt tapt for bokmålet og engelsken.
Dei som bur i Vassbygda/Vassbygdi er sameinte i kampen for nynorsken, men for somme er kampen viktigare enn for andre, og dei tek gjerne i bruk særs oppfinnsame – til dels bisarre – verkemiddel for å få ut bodskapen. Dessutan er det ein annan viktig strid som førast internt mellom bygdefolket: kampen mellom a-målet og i-målet. For å markere ståstaden køyrer dei mest ihuga i- og a-tilhengjarane gjerne Toyoti eller Auda.
Forfattaren kjem til Moa bibliotek torsdag 21. september. Tilstellinga er eit samarbeid mellom biblioteket og Borgund Mållag.